Zend Studio - 247 :)

Zend нь PHP дээр суурилсан олон төрлийн бизнес хийдэг гэдгийг та бүхэн мэдэх байх slogan нь хүртэл The php company гэж байгаа. Та бүхэн магадгүй өөрснөө анзаардаггүй боловч ихэнх нь Zend-ийн бүтээгдэхүүнийг хэрэглэж байгаа. Энэ нь ихэнх PHP тэдний алдартай бүтээгдэхүүнүүдийн нэг болох Zend Optimizer нь ихэнх Apache серверүүд дээр ажиллахаар тохируулагдсан байдаг.

За энэ ч яахав гол яриандаа оръё. Эхэн үедээ EmEditor дээр ажиллах үед ялангуяа бага хэмжээний төслүүдийн хувьд энэ нь боломжтой байлаа. Харин том төслүүд дээр ажиллах үед улам хэцүү болж эхэлсэн. Маш олон файлууд, тэгээд санамсаргүй нэг алдаа гаргачихдаг. Нөгөө алдаагаа Debug хийх боломжгүй учраас олох гэдэг бөөн цаг алдсан хэрэг болдог.

Ингээд илүү олон файлтай зэрэг нэг төсөл байдлаар ажиллах боломжтой засварлагч хайж эхэлсэн билээ. Дээхнэ үед хальт сонирхоод Юникод дэмжихгүй учраас гологдсон PHPEditor гэх мэт программуудаа эргэж нэг үзлээ нөгөө л бахь байдгаараа. Тэгэж байгаад ZendStudio-г юу ч гэсэн туршаад үзье гэж шийдлээ. Одоогоос бараг 8 сарын өмнө юмуу даа тэр үед бид Banjig.Net дээр маш их өөрчлөлт оруулж хуучин кодуудаа нийтэд нь хянаж өөрчлөхийг нь өөрчилж байсан тул бушуухан нэг гайгүй засварлагч, гайгүй хөгжүүлэлтийн орчин олж авахыг үнэхээр их хүсэж байлаа.

Хамгийн анх төслийг маш ухаалгаар зохицуулж байгаа, мөн Юникод дэмждэг нь таалагдав. Дараачийн ээлжинд тухайн төсөлд орсон бүх файлуудыг анализ хийн код бичих явцад ухаалгаар гүйцээх, хувьсагчдыг зөв байранд байрлуулах тал дээр туслаж байгаа нь таалагдлаа. Тэгээд эцэст нь хамгийн чухал гэж болох зүйл нь ZendStudio-ийн нэг хэсэг болгох ZendStudioServer-ийг суулгаад жинхэнэ ид хавыг нь мэдэрсэн дээ.

Та PHP кодыг яг бодитой ажиллаж байх үед нь зайнаас debug хийх боломжтой гэж төсөөлдөггүй байсан байх. Зарим засварлагчид кодыг синтакс түвшинд нь шалгах, debug хийх боломжтой байдаг ч зайнаас шууд бодитойгоор debug хийж чаддаггүй.

Тэгвэл ZendStudio-г ашигласнаар энэ боломжийг маш амархан хэрэглэх боломжтой болдог. Таны вэб хөтлөгч дээр ZendStudioToolbar суух ба та тэнд байх debug товчийг даран өөрийнхөө вэбийнхээ алдааг хүссэнээрээ нарийвчлан шалгах боломжтой болно.

Мэдээж дээр дурдсан бүхэн бүх боломж нь биш ZendStudioClient нь PHP Documentor, WSDL Generator, Code Analyzer гээд олон чухал хэрэгслүүдээс гадна төслийнхөө файлуудыг шууд CVS, SVN сервер лүү илгээх болон файлыг шинэчлэн авах боломжтой. Мөн 5.0 хувилбараасаа эхлээд CodeFolding буюу хэсэг ижил чанартай кодыг нэг багц болгон нугалах боломжтой болсон.

Та үнэхээр жинэхэн утгаар нь PHP төсөл дээр ажиллаж, жинхэнэ чанартай кодыг хурдан хугацаанд гаргах боломжтой болно.

Магадгүй Монгол хүмүүсийн бүрэн өөрсдийн гараар бүтээн бий болгосон хамгийн том PHP төсөл гэж болох Banjig.Net-ийн бүхий л кодыг ZendStudio ашиглан хөгжүүлдэг.

Та бүхэн ч гэсэн туршаад үзээрэй. Танд заавал таалагдах албагүй, учир нь хүн бүхэн ижилхэн зүйлийг хийдэггүй, тэр хирээрээ хүсэж байгаа зүйлс нь ч өөр байдаг хойно. Тэгэхдээ ямартай ч амжилт хүсье. Монголын PHP-чингүүд илүү олон болж, илүү чанаржих болтугай!