PHP

Нилээн дээрээс бодож явсаар байгаад амжихгүй байсан. Харин өчигдөр өөрийнхөө блог дахь PHP-тэй холбоотой бичлэгүүдэд бичсэн хүмүүсийн сэтгэгдэлийг хараад нэг зүйл бодлоо. Ингээд ганцаараа чалчаад суухын оронд аль болох олон хүнийг нэгтгээд хамтын хүчээр нэгэн зүйл хийвэл илүү олон хүн үр дүнг нь хүртэх нь гарцаагүй гэж.

Тэгээд өдөр ажлынхаа завсраар Drupal-ыг жаахан туршаад үндсэн шаардлагуудыг хангаж байсан, бас ч үгүй энгийн атлаа их боломжтой код бүхий, аюулгүй байдлын талаасаа бас гайгүй санагдаад саяхан бүртгүүлсэн байсан phpmn.org домайнд тохируулаад бага зэрэг янзлаад тавьлаа.

Хэрвээ та PHP сонирхдог бол энэ сайтаар ороорой. Зөвхөн ороод зогсохгүй мэддэг чаддагаа хүмүүстэй хуваалцаарай гэж уриалж байна. Бид цөөхүүлээ ч гэсэн цөөхөн гэдэг үг нь зөвхөн жижиг гэдэг сул талаасаа гадна, илүү шалмаг, хурдан гэсэн маш чухал утгийг агуулж болохыг сануулах нь илүүц буйзаа. Нэгдэцгээе, нэгдээд илүү шалмаг хөдөлцгөөе!

Вэб хийдэг хүн болгоны толгойны өвчин бол вэбээ хэрхэн хурдан нээгддэг болгох бэ гэсэн бодол. Энэ өвчингөөс гарахад тань бага ч болсон тус болох болов уу гэж бодоод үүнийг бичиж байна.

Вэб удаан нээгдэх асуудлыг ерөнхийлөн 3 хувааж болно.

1. Таны интернэт холболт удаан
2. Таны сервер байрлаж буй газрын болон таны вэбийг үзэж буй газрын хоорондох интернэт сүлжээний урсгал бага буюу удаан
3. Таны серверийн ачаалал ихэдсэн, ялангуяа динамик вэб сайтуудын хувьд

Эхний 2 тохиолдол нь яах аргагүй мэдээлэл дамжих явцад гарч буй бэрхшээл учраас дамжуулах мэдээллийг аль болох бага байлгахыг оролдох хэрэгтэй гэсэн үг. Мэдээж зурагнуудаа вэбэд зориулан физик хэмжээг нь багасгах, олон зураг нэг хуудсанд оруулахгүй байх гэх мэтчилэнгээр аргууд хэлж болно. Харин физик утгаар нь багасгаж болохгүй текстийг яах бэ гэдэг асуудал гарч ирнэ. Жишээ нь миний блогийн нүүр хуудас төдийлөн их зураггүй атлаа хэмжээ нь 60 K орчим болж байна. Та энд дарж дэлгэрэнгүй тайланг харна уу. Энд байгаагаас HTML, Javascript, CSS зэрэг нь бүгд текстүүд, тэгээд бас чамгүй хэмжээ эзэлж буйг та анхаарсан байх.
Continue reading "GZIP ашиглан вэб нээгдэх хурдыг хэрхэн нэмэгдүүлэх тухай"

PHP хэрэглэж вэб программ бичих маш хялбар гэж хүн бүхэн боддог. Ингэж бодох нь ч аргагүй учир нь PHP-ийн өөрийн гол үндсэн шинж нь энэ, MySQL баазаас мэдээлэл гаргаад аятайхан хэлбэрт оруулаад харуулахад хэдхэн минутын ажил. Хувьсагчийн төрөл хувиргалт энэ тэр гээд илүү олон юм шаардахгүй. Харин ингэж бичигдсэн програм, өөрөөр хэлбэл PHP нь ердөө л нэг хялбархан скрипт хэл гэж бодож бичигдсэн програм жинхэнэ орчинд аюулгүй ажиллаж чадна гэж юу л бол.
Continue reading "PHP хэрэглэх амархан ч..."

Ажаад байхад манай мэдээллийн технологийн хүмүүс мэргэжлийн номоо англи хэл дээр үзээд ойлгоод байгаа юм шиг боловч яг үнэндээ эх хэл дээрээ үзэж байгаа шигээ бүрэн дүүрэн ойлгож авдаггүй бололтой. Олон зүйл дээр ажиглагдсан. Ялангуяа эхлэн суралцагчид анхнаасаа дутуу ойлгоод явчихаараа тэгээд ер нь л хэцүүхэн нөхцөлд сурдаг. Энэ байдлыг засахад жаахан ч гэсэн хувь нэмрээ оруулчих санаатай нэг ном бичих санаа байна. Номоо ерөнхийдөө LAMP (Linux Apache MySQL PHP/Perl) орчны зүйлсийг агуулахаар бодож байгаа.
Continue reading "PHP ном бичих санаатай"

Би PHP хэрэглэж эхлээд 6 жил болж байна. Энэ хугацаанд ихэнх зүйлсийг өөрөө бие даан үздэг байлаа. Анх FrontPage хэрэглэдэг байв, дараа нь Dreamweaver. Эдгээр нь HTML засварлагчид тул дунд нь PHP код бичихэд ядаргаатай санагдаж эхэлсэн.

Тэгээд ч сүүлдээ гараараа шууд бичихийг илүүд үздэг болоод сүүлийн 3 жил EmEditor хэмээх маш чадварлаг засварлагчийг хэрэглэлээ. Үүнд бол үнэхээр өөлөх юм байхгүй. Хамгийн гол давуу талууд нь ажиллахдаа маш хурдан, Юникод бүрэн дэмжинэ, кодыг програмччлалын хэл, төрлөөс нь хамааруулж өнгөөр ялгах чадвар нь маш сайн, олон файлаас зэрэг хайх, түүнчлэн хайлтын үр дүнг тодруулж харуулах нь гайхалтай. Тэгээд мэдээж мөрийн дугаар, шугам, тохируулгыг хадгалах боломж гээд маш олон боломжуудтай. Тэгэхдээ нэг гэм нь үндсэн зориулалт нь ерөнхий зориулалтын засварлагч тул анхлан суралцагч, эсвэл бэлэн код гүйцээгч боломжтой хэрэгслүүд ашиглаад заншсан, эсвэл HTML код шууд бичихдээ маруухан хүмүүст бол тийм ч сайхан эд биш санагдах байх.

Хэдийгээр би одоо томоохон төслүүд дээр PHP код бичихэд төдийлөн хэрэглээд байдаггүй ч ажил дээрээ бүх хүмүүсээ зөвхөн энэ засварлагчийг ашиглуулдаг. Түргэн хугацаанд засах PHP файлуудтай ажиллахдаа ч хэрэглэдэг.

Харин одоо би ZendStudio хэрэглэдэг. Яагаад ингэх болсноо та бүхэнд хүргэхийг хичээлээ.
Continue reading "Zend Studio - 247 :)"