Хүжийгийн блог - Чөлөөт цаг

Хамгийн дуртай төлсөн татвар

nospam@example.com (Л.Хүрэлбаатар) — Sun, 14 Jan 2007 13:37:23 -0600

Нилээн дээр Capital JC-ийн тухай блогдоо бичиж байсан. Харин хэд хоногийн өмнө буюу 2007 оны 1 сарын 12-нд би албан ёсоор гишүүн болж гишүүнийхээ татварыг төлж, гишүүний батламж болох JCI-ийн энгэрийн тэмдэг, Capital JC-ийн таних тэмдэг гэж болох час улаан зангиаг хүлээн авлаа.

Capital JC байгууллага маань жил бүрийн 1 сард Tax Party хэмээх арга хэмжээг зохион байгуулж энэ арга хэмжээний үеэр гишүүд нь тухайн жилийнхээ татварыг төлж, мөн шинээр албан ёсоор элсэж буй гишүүдээ хүлээн авах ёслол зохион байгуулдаг юм байна. Мэдээж Tax Party-ний үеэр гишүүдийн удирддаг компаниудын бүтээгдэхүүнээс бүрдсэн шагналтай азийн сугалаа шалгаруулах, 2007 оны шинэ ерөнхийлөгч ирэх оныхоо төлөвлөгөө танилцуулах гээд олон арга хэмжээ болдог.

Үүнээс гадна Capital JC-ийн төлөвлөгөөт ажлууд, гишүүдийн зураг, төрсөн өдөр, компаниудын танилцуулга агуулсан Table Planner, мөн Capital JC-ийн төлөвлөгөөт ажлын агуулсан том хуанлиг гишүүн бүрт бэлэглэсэн.

Энэ үйл ажиллагаа надад үнэхээр их таалагдсан болохоор энд бичихгүй байж чадсангүй. Гишүүний татвар нэртэй боловч энэ мөнгийг төлөхдөө яагаад ч юм их баяртай байлаа. Үнэхээр миний амьдралдаа хамгийн баяртайгаар төлсөн татвар энэ болов уу...

Бүсгүйчүүдээ халтиргаатай замаар гарахдаа хулгайчаас болгоомжил

nospam@example.com (Л.Хүрэлбаатар) — Sun, 14 Jan 2007 13:32:03 -0600

Өөрийн үзсэн харсан дээр тулгуурлан нэгэн зөвлөгөө бичлээ. Та бүхэнд хэрэг болж магад гээд энд холбоосыг оруулав.

http://ask.banjig.net/advice-163.html

Capital JC

nospam@example.com (Л.Хүрэлбаатар) — Mon, 30 Oct 2006 12:19:21 -0600

Өнгөрсөн жил талбайн урд талын самбар дээр дэлхийн JCI-ийн дэд ерөнхийлөгч Монголд айлчилж буй тухай мэдээллийн самбар тавигдсаныг үзээд анх JCI гэдэг үгийг сонсож байлаа. Харин энэ намар миний найз MySoft ХХК-ийн захирал Баянмөнх намайг Capital JC байгууллагад элсээч хэмээн ятгасан юм.

Анх эхлээд яг ямар учиртайг нь ч мэдэхгүй тээнэглэзлээ. Тэгсэн 24 цаг гэдэг үйл ажиллагаа байгаа, түүний дагуу манай гишүүд бүтэн 24 цагийн турш яг цэрэг хүн шиг байдаг тэнд юу ч гэсэн очоод үзээч гэсний дагуу нэг талаар цэрэгт яваагүй хүнд сонин санагдаад нөгөө талаар бас ер нь ямархуу байгууллага гэдгийг бага ч гэсэн таньж мэдье хэмээн явахаар шийдлээ.

Зэвсэгт хүчний тусгай сургалтын Таван толгой дахь баазад очин тэнд амьдралдаа үзээгүй олон зүйлийг үзэж үнэхээр анх Баянаагийн яриад байсан манайхан их гоё гээд байдгийг мэдэрсэн дээ. Таван толгойн ангид очоод танк, питер унаж гар буунаас эхлээд ротын пулематаар хүртэл буудаж, Иракийн энхийг сахиулах ажиллагааны сүүлийн ээлжинхэнтэй хамтдаа оройн тоонд жагсаж бүтэн 24 цагийг өнгөрүүлсэн билээ.

Анх 1915 оны 10 сарын 13-ны өдөр АНУ-ын Миссури мужийн Сэнт Луйс хотноо залуусын бизнесийн чадвар, зр бүтээмжийг хөгжүүлэхэд нь туслах зорилгоор Young Men's Progressive Civic Association (YMPCA) хэмээх байгууллагыг 32 залуу байгуулж байсан бөгөөд энэ байгууллага нь улам өргөжин тэлж одоогоос 60-аад жилийн тэртээ JCI буюу Junior Chamber International хэмээх олон улсын байгууллага болсон байна.

Монголын залуус 90-д оноос монголд энэ байгууллагийн үндэсний байгууллагыг ажиллуулж байгаад улмаар 2003 оны наймдугаар сард JCI байгууллагыг олон нийтэд танилцуулах, үзэл бодлыг нь нийтэд түгээх, хөгжүүлэх, гишүүнчлэлийнхээ тоог нэмэгдүүлэх, үйл ажиллагааныхаа цар хүрээг өргөтгөхийн зэрэгцээ залуусын өвөрмөц сонирхолд нийцсэн өөрсдийн онцлог шинж чанараа агуулсан анхан шатны байгууллагуудыг шинээр бий болгох зорилгын дор тухайн оны ерөнхийлөгч Б.Зоригт, 2004 оны ерөнхийлөгч С.Сэргэлэн нарын санаачлагаар Улаанбаатар JC-ийн гишүүнчлэл дээр тулгуурлан Ulaanbaatar JC, Capital JC, Ikh huree JC, Central JC гэсэн анхан шатны байгууллагуудыг шинээр үүсгэн байгуулахаар шийдвэрлэсэн юм байна. Ийнхүү Монголын JC-гийн түүхэнд Capital JC анхан шатны байгууллага үүсч бий болох хөрс суурь тавигдсанаар гишүүн Н.Болд, Б.Лхагважав, Ц.Наранцэцэг нарын оролцоотойгоор 2003 оны 08 сарын 16-ны өдөр албан ёсны үйл ажиллагаагаа эхэлсэн ажээ.

Уржигдар буюу 2006 оны 10 сарын 28-нд тэрэлж дэх Улаанбаатар - 2 амралтын газарт Capital JC-ийн 2006 оны намрын чуулган болсон бөгөөд энэ нь миний оролцсон Capital JC-н анхны томоохон хэмжээний, олон гишүүд оролцсон үйл ажиллагаа байлаа.

Энэ намрын чуулганд оролцсоноор би JCI байгууллагын мөн чанар, эрч хүчийг улам ихээр мэдэрсэн, цаашид Capital JC-ийн үйл ажиллагаанд байнга идэвхийлэн оролцож байх нь залуу хүний хувьд өөрийгөө хөгжүүлэх, удирдагч хүнд байх олон зүйлийг сурч мэдэхэд үнэхээр чухал хүчин зүйл юм гэдгийг ч ойлголоо.

Capital JC-ийнхээ бүх гишүүдэд хувийн амьдрал болон бизнест нь далай шиг их амжилтыг хүсэн ерөөе!

- Дэлхийн JCI байгууллагын вэб
- Capital JC байгууллагын вэб

Алдартай нэгэн Монгол дуу

nospam@example.com (Л.Хүрэлбаатар) — Tue, 24 Oct 2006 18:58:43 -0500

Аав, ээж, охин гурвын тухай дуулдаг Чандмань эрдэнэ гээд Өвөрмонгол дууг манайхан андахгүй байхаа. Би ч хувьдаа хөөрхөн донжтой дуу байна даа гээд хааяа сонсох дууны жагсаалтдаа оруулчихдаг.

Харин тэгтэл сая Hangzhou Investment Forum-д ASICIO-ийн шугамаар компаниа төлөөлөн явах замд Шанхайгаар дайрлаа. Тэгээд нөгөө алдарт Nanjing Road-аар явж байтал нөгөө дуу маань цуурайтаж байх юм. Гайхаад л өнгөрлөө.

Тэгээд Hangzhou-д очоод хүмүүстэй нэрийн хуудсаа солилцоод танилцлаа. Тэгээд Монголоос ирсэн гэтэл харин зарим нь нөгөө аав, ээж, охин гурвын тухайн алдарт Монгол дуу гээд л учиргүй өмнөөс тэгэх юм. Ингэж хэлсэн хүмүүс нь Сингапур, Малайз нөхдүүд. Яах вэ нэг талдаа туу нь давхар хятад хэл дээр байдаг болохоор эдгээр хятад хэл мэддэг нөхдүүд сайн хүлээж авсан байх л даа. Тэгэхдээ л өвөр ч бай ар ч бай зөвхөн Монгол гэдэг нэрээрээ хүмүүст танил болж, Монголын гэх зүйлсийг нэгээр ч гэсэн нэмэгдүүлж байгаад нь баярлаж байлаа.

Зөвхөн баярлаад зогсохгүй бас хэдэн зүйл бодогдлоо.

Хэ хэ энд тог тасраад гүйцээлгүй орхисон хүмүүс сэтгэгдэл бичээд эхэлж.

За бодол гэхээр, манайхан Монголчууд ер нь аливаа зүйл хийхдээ томчуулыг дуурайж тэгээд тэдэнтэй ана мана үзнэ гэж байнга боддог шиг. Тэгээд өөрсөндөө байгаа боломжийг үл анзаардаг юмуу. Манайхны рок поп дуу бидэндээ хичнээн сайхан дуулаад ч гадныханд тэгж хүрэхгүй л болов уу. Тэртэй тэргүй тэнд нь манай дуучдаас хэдэн хувь илүү, үгүй илүү биш юмаа гэхэд адилхан хар мянган дуучин байгаа. Харин ааваа, ээжээ гээд донжийг нь олоод дуулаагүй л байна. Тэгэхээр бид өөрснийхөө онцлогийг л сайн нээж олох хэрэгтэй. Олон зүйл дээр. Outsourcing гэхэд жишээ нь манай хамгийн том нь ч ядаж хятад, вьетнамын энгийн нэг шиг тооны хүн байхгүй. Энэтхэгт л гэхэд жилдээ сая хол давсан хүн дээд боловсролын диплом өвөртөлж байна. Тэгэхээр тэдэнд байхгүй, байлаа гэхэд сул байдаг харин бидэнд байх давуу тал юу байж болохыг олж харах хэрэгтэй байх.

Дэлхий нэгэнт одоо хавтгай болсон гэдгийг би нөгөө алдарт "The World Is Flat" номыг уншаад мэдлээ бас Хятадын экспортын барааны үзэсгэлэнг Guangzhou-д очиж үзээд улам бүр яс махандаа шингэтэл ойлголоо. Тэгэхээр нэгэнт чөлөөт эдийн засгийн бодлого, дэвшилтэт технологийн ачаар хавтгайрсан энэ дэлхий дээр, хаана юу хийгдээд хэнээр дамжаад хэнд хүрч байгаа нь ойлгоход ч бэрх энэ хавтгайран ширэлдсэн энэ дэлхий дээр Монголчууд бид өөрсдийн давуу талыг олж харж, тэртэй тэргүй хийсвэр утгаараа хил хязгааргүй нэгэн том улсын иргэн мэт сэтгэж хөдлөх хэрэгтэй болжээ.

Харин юуг яаж сэтгэх нь таны хэрэг, хамгийн гол нь энэ дэлхий дээр зөвхөн Монгол байгаа гэж бодож, хятад бол бидний дайсан хэмээн зайгаа барьж өөрснийгөө хайрцганд хав дарваас бид хөгжихгүй нь лавтай үнэн болжээ.

Бид бүтээнэ чиг сөнөөнө чиг

nospam@example.com (Л.Хүрэлбаатар) — Tue, 19 Sep 2006 09:33:26 -0500

Манай ажлын урд талбайг өнгөрсөн хавар шинэ зам тавиад янзын болгосон. Гэтэл намар нь буцаагаад сэт татаад бөмбөг хаясан мэт болгоод хаячих юм. Усны шугам шинэчлэн сольж буй нэрээр Улаанбаатар хотыг бараг бүхэлд нь ийм байдалтай болгоод хаясаныг та анзаарсан байхаа.

Үүнийг заавал ингэж нэгнийхээ өчнөөн мөнгөөр бий болгосон зүйлийг устгахгүй, сүйтгэхгүйгээр янзалчих арга чарга олддоггүй юм байх даа.

Намаржингаа үргэлжилсэн энэ их ажлын эхлэл нь их эрч хүчтэй байлаа. Учир нь эхлээд тэд нүх ухаад байсныг нь сэт цохьсон. Харин дараа нь шинэ шугам тавих болохоор ажлын талбар дээр хэн ч байхгүй.

19-д байдаг хадам аавын маань гараашны үүдийг дайруулаад ухчихсан одоо болтол хэвээрээ. Бүтэн сар гаран гадуур гараашинд мөнгө тавьж байгийм. Ийм хүн олон байгаа, тэгэхээр энэ чинь олон хүний хувийн эрх ашигт шууд нөлөөлж, шаталт үүсгэж байгаа хэрэг биш гэж үү!
Continue reading "Бид бүтээнэ чиг сөнөөнө чиг"

Миний муу компьютер одоо л нэг ажиллахаар боллоо :)

nospam@example.com (Л.Хүрэлбаатар) — Fri, 21 Jul 2006 20:25:12 -0500

Ойрын хэдэн өдөр миний компьютер удаан гэж жигтэйхэн бүр юм хийх ч сонирхолгүй болгож орхив. Уул нь үзүүлэлт нь боломжийн л эд. Тэгээд сая учрыг олох гэж үзэв, амжилтанд хүрэв. Дашрамд хэлэхэд миний үйлдлийн систем Windows XP Pro Sp2.

Нэг хэсэг миний хатуу диск дүүрээд алингаа алдсан юм. Тэгээд өөр диск нэмж залгаад ажлын дискээ овоо зайтай болгосон ч удсан хэвээрээ л байлаа. Тэгэхээр нь Windows-ийн өөрийнх нь Disk Defragmenter ашиглан шинжилж үзэв. Тэгсэн жинхэнэ ноо нь харагддагийм байна. Учир нь диск дүүрэн үед хуулагдсан том файлууд зарим нь бүр 20 гаран мянган жижиг хэсгүүдэд таран байрлажээ. Ялангуяа байнга уншигдаж байдаг Google Desktop Search-ийн индекс файлууд ийм байх юм. Defragment хийхэд цаг их авах тэгээд ч дискний үлдсэн зай 10% хүрэхтэй үгүйтэй байгаа тул монголчлоод үзэхээр шийдлээ.
Continue reading "Миний муу компьютер одоо л нэг ажиллахаар боллоо :)"

Нээлттэй эхийн талаар

nospam@example.com (Л.Хүрэлбаатар) — Fri, 12 May 2006 11:15:01 -0500

Нээлттэй эхийн чиглэлээр ажиллаад 4 жил болжээ. Анх нээлттэй эхийн програм хэрэглэж эхэлсэн үеээ оруулбал 6 жил болох болов уу. Энэ хугацаанд Монголд нээлттэй эх хөгжүүлэх чиглэлд өөрийнхөө хирээр л зүтгэж ирсэн. Анх дангаараа sourceforge.net дээр phpDesk хэмээх төсөл эхлүүлэн ажиллаж байсан боловч тэр маань амжилттай болоогүй өөр багт шилжүүлсэн. Харин С.Бадрал зэрэг залуусын эхлүүлсэн OpenMN багийн гишүүн болсноор хүсэл маань илүү бодитой хэрэгжиж эхэлсэн билээ.

OpenMN хөгжүүлэгчдийн бөг дээр үндэслэн энэ багаа дэмжиж ажиллах OpenMN буюу Нээлттэй МН төрийн бус байгууллагыг хэдэн жилийн өмнө байгуулсан. Харин ажил хийгээгүй өдийг хүрсэн байлаа. Сүүлийн хэд хоногт идэвхтэй ярьсны дүнд ямар ч байсан Дөлмандахыг Гүйцэтгэх захирлаар ажиллуулахаар болсон.

Өчигдөр MUUG-аас зохиодог Unix Beer Party-д оролцлоо. Энэ удаа хамгийн гол нь ICTA-аас хүмүүс ирсэн байлаа. Гол нь яг юунд хүрэх гээд байгаа, юу хийх гэж байгааг тодорхой болгоод ирвэл бодлогоороо дэмжих боломж байгааг илэрхийлсэн нь маш чухал байлаа. Миний хувьд Монголд нээлттэй эхийг хөгжүүлэх гол арга зам нь төрийн нэгдсэн бодлоготойгоор ажиллах явдал гэдгийг сүүлийг хэдэн жилд маш сайн ойлгосон.

Continue reading "Нээлттэй эхийн талаар"