Хүжийгийн блог

Блогоо нүүлгэж байна

Өөрийн гэсэн блогийн сайт хөгжүүлээд түүн дээрээ блогоо бичээд явахыг олон жил бодлоо. Одоо харин тэр хүсэл маань биелж эхлэв бололтой. BBlog.mn үйлчилгээг Alpha хувилбараар нь нийтэд ил болгон тестэлж эхэллээ. Эхний хувилбарт орохоор төлөвлөгдсөн ажил 80% орчим болсон. Тиймээс өөрийн блогийг яаран шилжүүллээ. Цаашид энэ блог дээр бичлэг хийгдэхгүй бөгөөд, BBlog.mn харьцангуй зүгшрээд ажиллаж эхлэх үед энэ блогийн хаягийг шууд шинэ хаяг руугаа үсэргэдэг болгохоор төлөвлөж байна.

Миний шинэ блогийн хаяг: http://hujii.bblog.mn

Мартсанаас та ч гэсэн эртхэн BBlog.mn дээр нэг аятайхан нэр сонгож аваад блогоо эртхэн нээгээрэй гэж урьж байна. Ямар ч байсан өнөөдөр тодорхой хүмүүсийн хүрээнд нээлттэй болгосон хэдий ч 40 гаран блог үүсчихээд байна.

2,333,333 дахь ил захидал ба цахимжахуй

Өнөөдөр санамсаргүй http://greetings.banjig.net/ хаягаар ороод нийт илгээгдсэн ил захидлын тоо 2,333,333 гэхийг харлаа. Нэг талаар бэлэгшээгээд бас нөгөө талаар цахимжих үйл явц бас ч үгүй хурдан явж байгаа юм байна даа гэж бодлоо.

Бид Банжиг Ил захидал үйлчилгээг анх 2002 оны 10 сар хавьд эхлүүлж байсан санагдана. Түүний дундуур 5 сар орчим завсарласан, мөн бид анх эхлээд нийт илгээгдсэн картыг тоолдоггүй байсан зэргийг тооцвол энэ бас арай их тоо гарах байсан болов уу.

Тэгэхдээ чамлахааргүй их гэж миний ойлгож байгаа энэ тоо Монгол Шуудан ХК-ийн анх үүсгэн байгуулагдсанаасаа хойш илгээсэн цаасан ил захидлын тоотой харьцуулахад ямар гарах болоо гэж бас бодлоо. Сонин л харьцаа гарах байх.

Монголчууд маань интернэт орчинд хэрэглээ нь үнэхээр бага байна даа гэж бодсоор байсан ч олон янзын үйлчилгээ гаргах гэж хичээсээр ирсэн, харин үр дүн нь бидний хувьд үнэхээр гайхалтай. Учир нь шинэ үйлчилгээ гаргахын хирээр өмнөх үйлчилгээний хэрэглэгчдийн тоо өсөөд зогсохгүй шинэ үйлчилгээ маань ч олон хэрэглэгчдийг дагуулаад ирдэг. Тэгэхээр Монголчууд маань их л хурдтайгаар цахимжаад эхэлсэн бололтой.

Зарим нэг нь жамаараа явж байхад зарим нэгийг нь хүчээр хөдөлгөж буй нь жилийн 11 дүгээр анги төгсөж буй хүүхдүүдийн шалгалтын бүртгэлийг онлайнаар явуулах, бүртгэлийн хураамжийг онлайнаар картаар төлүүлэхээр болсон явдал. Би хувьдаа үүнийг сайшааж байгаа. Үнэхээр энэ интернэтэд холбогдсон тооцоолуурыг ашиглаад ямар нэгэн юм хийж болох юм байна шүү гэдгийг улам олон хүмүүс улам олон хэлбэрээр мэдрээсэй гэж хүснэ.

Google Adsense ашиглах тухай: Асуултуудад хариулах нь

Нилээн дээр Google Adsense ашиглах тухай нэгэн бичлэг хийж байсан маань олон хүнд хүрсэн бололтой. Гол нь тэр цагаас хойш олон хүн үүнийг хэрэглэдэг болж, зарим нэг нь анхныхаа чекийг хүлээн авцгааж Монголынхоо валютын нөөцийг бага ч гэсэн нэмэгдүүлж байгаад хувьдаа их баярлаж явдаг юм.

Дээрх бичвэрийг би энэ блог дээрээ мөн Банжиг.Нээтэд, phpmn.org сайтад оруулж байсан бөгөөд анх оруулснаас хойш олон асуулт асуугдсан юм байна. Тэгээд тэдгээр асуултанд хариулах байдлаар Google Adsense хэрэглэх гээд нэг л болж өгөхгүй байгаа хүмүүст тус болох болов уу гэсэн үүднээс үүнийг бичиж байна.

Асуулт 1: Burtguulehdee Website gedeg deer zaaval uuriin site tavih yostoi yum uu mail bichij tuslaach.

Хариулт: Google Adsense хөтөлбөрийн албан ёсоор хүлээн зөвшөөрдөг хэлэнд Монгол хэл байхгүй. Тэгэхдээ та өөрийн сайтыг бүртгүүлэхдээ орос хэлийг сонгож болно. Эсвэл өөрийн хийсэн ямар нэгэн англи хэл дээрх сайтыг ашиглаж болно. Хамгийн гол нь эхний зөвшөөрөл авах явдал юм. Нэгэнт эрхээ авсан тохиолдолд сурталчилгаа байрлуулах үйлчилгээний үндсэн нөхцлүүдийг л зөрчихгүй бол дараа нь өөр сайтууд дээр Adsense холбоосыг шууд оруулж болно. Энэ нь та анх авсан эрхийн бүртгэлээрээ бүх вэбүүдийнхээ орлогийг цуглуулах боломжтой гэсэн үг юм.

Асуулт 2: http://adsense.google.com - ni uuruuu haanaasaa munguu oldog yum ter talaar heleech

ХариултВэб дээр тавигдсан мэдээллээр бол сурталчилгаа байрлуулагчдад зориулсан Google Adwords хөтөлбөрөөр дамжин сурталчилгаа явуулж байгаа газруудын сурталчилгаа танай сайт дээр Google Adsense сүлжээгээр дамжин харагдах болон дарагдахад сурталчлуулагчаас өгч буй мөнгөний тодорхой хувийг нь танд өгөөд бусдыг нь Google авдаг. Тэгэхээр Google Inc. маань аугаа их технологийнхоо ачаар мөнгө төлөгч, мөнгө ологчдийн дунд зохицуулалт хийгээд мөнгийг үйлдвэрлэгдэхийг нь хараад сууж байна гэж хошигноход хол зөрөхгүй байхаа.

Асуулт 3: Sain uu. Тэгэхдээ илгээхээс өмнө таны хаягийг баталгаажуулж танд энгийн шуудангаар тусгай код ирдэг... gej bna shdee tee? Tegeheer yag yaj hayagaa bichih yostoi ve? jishee ni manaid ZIP code gej bdaggui. Jishee ni manaih Ulaanbaatar hot, Shuudangiin 21-r salbar, shuudangiin hairtsag-627 gevel yaj bichih ve? Esvel zugeer l geriin hayagaa bichih yum uu? Geriin hayag gevel Bayangol duureg, 8-r horoo 12-481 gej baigaa. Ene meted delgerngui hariulj ogno uu. Tus bolno gedegt naidaj bna. Amjilt husiye. Bi ene site deerh ad deer chini darna aa.

Хариулт: Танд мөнгийг чекеер явуулах тохиолдолд хаягийг заавал урьдчилан баталгаажуулдаг бөгөөд, ингэхдээ баталгааны кодыг Google энгийн шуудангаар илгээдэг. Энэ шууданг хүлээн авахын тулд танд ямар нэгэн байдлаар шуудан ирнэ гэсэн баттай хаягаа оруулах хэрэгтэй. Монголын нөхцөлд холбооны салбаруудад байрлах шуудангийн хайрцаг, эсвэл албан байгууллагын хаяг нь илүү найдвартай байх болов уу.

Асуулт 4: Hi. Nuuts kod oiroltsoogoor hed honogt irdeg be? Mon $-g sariin hedend ilgeegeed hed honj mongold irdeg be? Hariult ogno gej naidaj baina. HHBankd ogood shuud mongoo agvch boldgui yum uu?

Хариулт: Баталгаажуулах код нь энгийн шуудан ирдэг хугацаагаар ирнэ. 2 сар шахам лав болох байх шүү. Нэгэнт мөнгө тань авах хэмжээнд хүрсэн бол танд Google-ээс чек илгээх боломжтой болно. Чекийг энгийн шуудангаар авах бол энэ нь эрсдэлтэйгээс гадна бас л удна. Тиймээс миний хувьд DHL-ээр авдаг. Ингэхэд удлаа гэхэд 7 хоноод ирнэ, төлбөрийн хувьд 28$-ийг таны мөнгөнөөс суутган авдаг. ХХБанкны хувьд чекээ өгөөд 30-45 хоносны дараа мөнгөө авна. Учир нь бидний авах чек нь НьюИорк дахь CitiBank-наас авах ёстой байдаг. Харин азаар энэ банктай манай ХХБанк харилцдаг юм билээ. Тэгээд ХХБанкинд өгсөн чек цаашаа яваад мөнгө болоод ирэх энэ тэр гэсээр байгаад уддаг юм шиг байгийн. Мөнгөө авахад банк 1%-ийг нь суутган авдаг.

Асуулт 5: Хөөх Хүжий маань adsense-с анхныхаа цалинг авчихсан байх нээ. Одоо ч adsense-гүй сайт ч гэж байхаа больж. Гол нь монгол веб байхад "реклама от Google" гээд биччихсэн нь жаахан тийм санагдаад байгаа юм. Хэхэ, би блог дээрээ нэмээд орхисон чинь $1 орчим болсон байна лээ. Хэзээ Хүжий шиг анхныхаа чекийг хүлээж авдаг юм бол доо.

Хариулт: Хэ хэ асуулт ч биш юмаа. Тэгэхдээ энэ их чухал санагдаад. Хамгийн гол нь та үнэхээр өөрийн гэсэн блог эсвэл ажиллуулдаг вэбтэй бол шантрахгүйгээр урагшлаад байгаарай. Нэг л өдөр та чекээ гар дээрээ авна. Та бүхэнд хэрэгтэй болов уу хэмээн Google Adsense-ээр анхныхаа чекийг хэдийн авсан Батхүү хэмээх залуугийн бичсэн бичлэгийн холбоосыг орууллаа. Батхүүгийн бичлэг

Эцэст нь нэг зүйлийг нэмж хэлэхэд зарим хүмүүс хэт яараад мөн зарим нь мэдэхгүйгээсээ Google Adsense үйлчилгээний нөхцлийг зөрчсөн зүйл хийгээд эрхээ хаалгах тохиолдол мэр сэр гарсан шиг байна лээ. Тиймээс та бүхэн энэ үйлчилгээний нөхцлийг сайн уншаарай!

Өөрийн бүтээлийг үнэлүүлэх боломж

Банжиг Мэдлэг хэмээх үйлчилгээ нээгээд 3 сар орчим болж байна. Бид анхнаасаа энэ үйлчилгээг нилээд хэдэн чиглэлээр ажиллуулахаар төлөвлөсөн байсны зөвхөн эхний хэсэг нь болох асуулт хариулт, зөвлөгөөний хэсэг байсан юм.

Харин энэ удаа бас нэгэн чухал хэсэг болох Бүтээлүүд хэсгийг нээлээ. Энэ хэсгээр гишүүд өөрсдийн гар дээр байгаа өөрийн хийсэн дижитал хэлбэрээр хүмүүст хүргэж болох бүхий л төрлийн оюуны бүтээлийг хүмүүст худалдан худалдсан үнийн дүнгийн 60%-ийг өөртөө ашиг болгон авах боломж олгох үйлчилгээ юм.

Бүтээл гэдэг нэрийн доор олон зүйлийг ойлгож болно. Та жишээ нь оюутан байлаа гэхэд өөрийн хийсэн дипломын ажил, реферат, дадлагын тайлан гэх мэт зүйлсээ тохирсон үнээр нь үнэлэн байрлуулах боломжтой. Манай буюу компьютерийн мэргэжлийн хүмүүс ямар нэгэн программын гарын авлага эсвэл хүнд асуудал шийдсэн алгоритм энэ тэрээ ч худалдах боломжтой болох юм.

Та мөн заавал худалдахгүйгээр хүмүүст хүргэе, түгээе гэсэн зүйлээ үнэгүй байрлуулсан ч болно.

Монгол хүмүүс өөрийн оюуны бүтээлийг үнэлүүлж сурч байж улсаа хөгжүүлэх боломжтой гэсэн миний өөрийн хувийн болон хамт олны маань үзэл бодлын, чин эрмэлзлийн торгон ирийг хурцлан байж бид энэ салбарыг нээсэн билээ.

Ту удахгүй бид Банжиг Мэдлэг үйлчилгээг жинхэнэ мэдлэгийн эх уурхай болгох бас нэгэн үйлчилгээг танилцуулах болно. Мэдлэг улам ихээр түгэх болтугай.

BJobs.mn ажиллаж эхэллээ

Удаан дуншсаны эцэст ерөнхийдөө ажиллаж эхэллээ. Мэргэжлийн хүний нүдээр бол үүнийг Beta хувилбар гэж ойлгох нь зүйтэй. Харин энгийн хэрэглэгчдийн нүдээр бол 90% орчим боломжууд нь бүрэн ажиллаж байгаа, ер нь бол ажиллаж эхэлсэн гэхэд болно доо.

Ерөнхий зарчмыг Yahoo! HotJobs-оос анх авч байсан боловч гадаадын ажил зууч олон талаараа Монголд байдгаас эрс ялгаатай тул бараг ихэнх зүйлийг Монголд тохируулан бодож боловсруулсан гэхэд болно.

BJobs.mn маань зөвхөн өөрөө ажилд зуучлаад зогсохгүй бусад ажил зуучийн байгууллагуудад ажил зуучийн үйл ажиллагаагаа BJobs.mn дээр тулгуурлан явуулах боломж олгож байгаагаара шинэлэг юм. Цаашид байнга ажиллах, олон талын хүчин зүйлсийн тооцоолсон зэргээрээ Монголдоо анхдагч гэж болох байхаа.

Анхных болохоор яг зах зээл дээрээ бидний боловсруулсан энэ загвар хир зэрэг амжилттай ажиллахыг мэдэхгүй байна. Хэрвээ зарим хэсэг нь амжилтгүй болвол зарчимд нь өөрчлөлт оруулаад л явах болов уу!

Юутай ч гэсэн эхлүүллээ. Хамтран ажилладаг Монголиа Дайрект ХХК-ийн хамт олон маань ч их хичээж ажиллах байх гэж найдаж байна.

Аа тийм технологийн хувьд BJobs.mn дээр нэг их нарийн хэрэглэсэн зүйл байхгүй. Маш энгийн хийгдсэн болно.

Bye Google SOAP Search API and Welcome AJAX Search API

Нилээн хэдэн жилийн өмнө нэг курсын ажил дээр Google SOAP Search API ашиглаж нэг програм бичих хэрэгтэй болоод анх үүнийг хэрэглэж байлаа. Тухайн үедээ Servlet, JSP ашиглаад хийж байсан санагдана. Дараа нь PHP дээр нэг хийгээд Banjig.Net дээр ашиглаж байсан боловч өдөрт хайлт хийх хязгаар нь 1000 тэгээд ч заавал Google өөрөө байхад тийм юм хийгээд яахав гээд орхиж байсан.

Google SOAP Search API маань SOAP ашиглан Google-ийн серверт тусгай бүртгүүлсэн API Key-ээр хандан хайлтын үр дүнг аваад түүнийг хүссэн хэлбэрээрээ хүссэн газраа харуулах боломж олгодог байлаа. Харин сая вэбээр нь зочилтол AJAX Search API гэдэг нөхөр гарч ирсэн тул 2006 оны 12 сарын 5-наас эхлэн нэмж SOAP Search-д зориулж API key олгохгүй харин хуучин авсан байсан хүмүүсийн хувьд энэ үйлчилгээ хэвээр үлдлээ гэсэн мэдээлэл байх юм.

Ойрд Google-ээр гүнзгий яваагүй болоод тэрүү их сонирхоод үзлээ. Үнэхээр AJAX Search API маань илүү юмаа. Зөвхөн AJAX ашигласан гэдгээрээ биш хамгийн гол нь хайлтыг Вэб, Мэдээ, Блог, Локал мөн Видеоноос нь хүртэл хийх юм байна. Мэдээж нэгэнт AJAX тул ирсэн үр дүнг хүссэнээрээ загварт оруулаад харуулж болох нь ээ. Үнэхээр хальт харахад их таалагдлаа.

Ойрын үед Banjig.Net дээрх зарим үйлчилгээнд үүнийг нэгтгэхээ шийдлээ. Тэгж байгаад болохоор нь блог руугаа шийдэл энэ тэрээсээ хуваалцаж бичнэ ээ.

Хамгийн дуртай төлсөн татвар

Нилээн дээр Capital JC-ийн тухай блогдоо бичиж байсан. Харин хэд хоногийн өмнө буюу 2007 оны 1 сарын 12-нд би албан ёсоор гишүүн болж гишүүнийхээ татварыг төлж, гишүүний батламж болох JCI-ийн энгэрийн тэмдэг, Capital JC-ийн таних тэмдэг гэж болох час улаан зангиаг хүлээн авлаа.

Capital JC байгууллага маань жил бүрийн 1 сард Tax Party хэмээх арга хэмжээг зохион байгуулж энэ арга хэмжээний үеэр гишүүд нь тухайн жилийнхээ татварыг төлж, мөн шинээр албан ёсоор элсэж буй гишүүдээ хүлээн авах ёслол зохион байгуулдаг юм байна. Мэдээж Tax Party-ний үеэр гишүүдийн удирддаг компаниудын бүтээгдэхүүнээс бүрдсэн шагналтай азийн сугалаа шалгаруулах, 2007 оны шинэ ерөнхийлөгч ирэх оныхоо төлөвлөгөө танилцуулах гээд олон арга хэмжээ болдог.

Үүнээс гадна Capital JC-ийн төлөвлөгөөт ажлууд, гишүүдийн зураг, төрсөн өдөр, компаниудын танилцуулга агуулсан Table Planner, мөн Capital JC-ийн төлөвлөгөөт ажлын агуулсан том хуанлиг гишүүн бүрт бэлэглэсэн.

Энэ үйл ажиллагаа надад үнэхээр их таалагдсан болохоор энд бичихгүй байж чадсангүй. Гишүүний татвар нэртэй боловч энэ мөнгийг төлөхдөө яагаад ч юм их баяртай байлаа. Үнэхээр миний амьдралдаа хамгийн баяртайгаар төлсөн татвар энэ болов уу...

Бүсгүйчүүдээ халтиргаатай замаар гарахдаа хулгайчаас болгоомжил

Өөрийн үзсэн харсан дээр тулгуурлан нэгэн зөвлөгөө бичлээ. Та бүхэнд хэрэг болж магад гээд энд холбоосыг оруулав.

http://ask.banjig.net/advice-163.html

Google Code Search

Google Labs-ийн шинэ төсөл Google Code Search ашиглан олон нээлттэй кодуудаас шууд хайлт хийх боломжтой болжээ. Хамгийн гол нь заавал нэтээр баахан CVS, SVN хэсээд явахааргүй болох нь. Та ч гэсэн өөрийн кодуудыг шууд хаягийг нь өгөн бүртгүүлж болох юм байна.

Та хайлтаа программын хэлээр төрөлжүүлж болохоос гадна шууд regular expression ашиглаж болно гээд боддоо. Жишээ нь lang:php mb_strlen гээд бичихэд mb_strlen агуулсан PHP кодууд гарч ирэх нь ээ.

Хаяг нь : http://www.google.com/codesearch

Интернэт дэх Монгол агуулга болоод шошгийн тухай

Монгол вэбүүд маань ихэнхдээ сонингийн мэдээлэл оруулаад зарим нь хааяахандаа энд тэднээс мэдээлэл орчуулж тавиад байдаг нэг хэсэг, эсвэл хэрүүл уруулаах дүүрсэн баахан ижилхэн форумууд, зарим нэгэн тв бичлэг, дуу, клип нэг доор цуглуулсан сантай л байлаа.

Сүүлийн үед мэргэжлийн голдуу хүмүүс маань Блог бичиж, мөн мэргэжлийн хүмүүс хамтран тусгай вэб ажиллуулж эхэлснээр Монгол агуулга арай өөр шинжтэй болж ирсэн. Тэгэхдээ л агуулгын цар хүрээ хязгаарлагдмал байсаар байгаа.

Харин бид саяхан Банжиг Мэдлэг үйлчилгээг нээгээд агуулга баяждаггүйн гол шалтгаан нь вэб хөгжүүлэгчид, энэ чиглэлийн үйл ажиллагаа явуулдаг компаниуд хэрэглчдийнхээ эрэлт хэрэгцээнээс хол хоцорч явааг илтгэж байгааг ойлгох шиг боллоо. Туршилтын журмаар ажиллаж эхлээд 10 орчим хоноход нийт 300 орчим асуулт асуугдаж, 1000 гаран хариулт бичигдэж, 100 гаран орчим зөвлөгөө бичигдсэн байх юм. Хамгийн гол нь асуултууд нь үнэхээр хэн нэгэн хүнийн мэдэхийн хүссэн асуулт, хариулт нь чин сэтгэлээсээ өгч байгаа хариултууд.

Энэ эрчээрээ бол Монгол агуулга төрөл бүрээр асар хурдацтай баяжих бололтой. Иймээс эхний ээлжинд зөвлөгөөнийх нь хэсэгт шошго хэрэглэхээр шийдлээ. Хэдийгээр мэдээллээ ангилсан ч гэсэн энэ мэдээлэл ихсэхийн хирээр зөвхөн ангиллаар мэдээлэл олж үзэх нь цаг хугацаа, үр дүнгийн хувьд учир дутагдалтай юм.

Шошго гэдэг маань англи хэлтэй сайтууд дээр tag, label, taxonomy зэргээр нэрлэгддэг. Анх нийтийн зургийн нэгдсэн сан гэж болох flickr.com, мөн нийтийн вэбийн санамж гэж болох del.icio.us сайтуудад хэдхэн жилийн өмнөөс хэрэглэж эхэлснээр Шошго хэмээх ойлголт интернэтэд бий болсон билээ. Шошгийн хамгийн гол зорилго нь асар их хурдацтайгаар нэмэгдэж байгаа мэдээллийг тодорхой түлхүүр үгүүдээр цэгцлэн ангилах явдал юм. Энэ ангилах явцыг хэн яаж хийдгээрээ сайтууд өөр өөр байдаг. Жишээ нь flickr.com дээр хэрэглэгчид зураг оруулахдаа зурагнууддаа өөрөө шошго хаддаг бол, del.icio.us дээр тухайн вэбийг санасан хэрэглэгчээс гадна өөр хүмүүс бас шошго хадах боломжтой байдаг.

Банжиг Мэдлэг үйлчилгээний хувьд Монголдоо хамгийн анх Шошго хэрэглэж эхэлж байгаа билээ. Одоогоор хэрэглэгчид зөвлөгөө оруулахдаа өөрийн зөвлөгөөнд шошго хадаж болох бөгөөд үүнийг нь Банжиг.Нээтийн ажилчид агуулгын болон үг үсгийн алдааны талаас нь хянан зөвлөгөөтэй хамт нийтэлж байгаа юм.

Цаашид интернэт дэх Монгол агуулга зөвхөн тооны хувьд биш чанар агуулгийн хувьд илүү сайжрах болтугай! Энэ үед өөрийн болон бусдын мэдээлэлд шошго хадаж, мөн мэдээлэл хайхдаа шошгон үүлэн дундаас сонголт хийх зэрэг нь нийтлэг болох буй за.

Банжиг Мэдлэг сайт бүрэн ажиллаж эхлэхэд бараг бэлэн боллоо

Banjig.Net дээр Блог хийж байгаа тухай өмнө ярьж байсан. Энэ маань хараахан бэлэн болоогүй байгаа. Харин бид шинээр Банжиг Мэдлэг хэмээх үйлчилгээг бий болголоо. Та http://ask.banjig.net хаягаар орж үзээрэй. Ерөнхий зарчимын хувьд Yahoo! Answers-ийн клон гэж ойлгож болно. Yahoo! Answers-д байдаг үндсэн боломжуудыг бараг 80%-тай оруулсан. Тэгэхдээ бид Banjig.Net-ийн болон Монгол хэрэглэгчдийн онцлогт тохируулж олон зүйлийг өөрчилсөн. Жишээ нь энд хэрэглэгч бүр зөвлөгөө оруулах боломж, оноо авахын хирээр Банжиг Дансандаа нэгж хуримтлуулах боломж гээд олон зүйлийг нэрлэж болно.

Хөгжүүлэлтийн явц ерөнхийдөө beta түвшинд гэж ойлгож болно. Зарим төлөвлөсөн боломжууд жишээлбэл, булхайг илчлэх үйлдэл, хэрэглэгчийн асуулт сунгах болон хаахтай холбоотой үйлдлүүд, шошгийн хэрэглээ, сэтгэгдэл оруулах хэсгүүд локалаар туршигдаж байгаа бөгөөд ойрын өдрүүдэд үндсэн сайтаар дамжин туршигдаж эхлэнэ. Тэгэхлээр Банжиг Мэдлэг үйлчилгээ маань дахиад 7-10 хоног болоод бүрэн хэмжээгээр ажиллаж эхлэнэ гэсэн үг юм.

Банжиг Мэдлэг үйлчилгээг нээсэн хамгийн гол шалтгаан нь Монголчууд харилцан мэдлэгээ солилцож бие биедээ туслах явдал юм. Одоо монголчуудын түгээмэл хэрэглэдэг форум нь энэ хэрэгцээг хангахдаа туйлын учир дутагдалтайгаар барахгүй цөөн хэдэн Монголчуудыг маань хэрүүлчин болгож дуусгаад байгаа мэт санагддаг.

Харин Блог болохоор олон асуудал нэг доор төвлөрч чадахгүй нэг асуултад олон хүн шууд хариулах боломжоороо учир дутагталтай.

Yahoo! Answers мэтийн том сайтуудыг Монголчууд хэрэглээд нэгнийхээс асуултанд хариулна гэдэг худлаа. Тиймээс бид Банжиг Мэдлэгийг нээсэн.

Одоогоор Блог, Номын өргөө, Ажлын зууч үйлчилгээнүүдийг шинээр нээхийн зэрэгцээ хуучин үйлчилгээнүүдээ улам сайжруулах ажил хийгдэж байна. Номын өргөөний хувьд ямар ч зүйлийг дуурайхгүйгээр цоо шинээр хийнэ. Youtube энэ тэрийн зарим боломжуудаг тусгах асуудал гарах байхаа.

За за ойрд юу хийж байгаагаа нэг бичмээр санагдаад бичлээ. Уул нь Блог маань бэлэн болчихвол иймэрхүү зүйлсийг хувийн блог руу биш хөгжүүлэгчдийн блог болгоод салгамаар л байна. Яг одоо би Блогийг дуусгаад тэгээд http://hujii.bblog.mn хаягаар ороод анхныхаа бичиглэлийг хийх мөчөө тэсэн ядан хүлээж байна.

Въетнамууд намайг гайхшруулав

Саяхан Токио-д Asocio Summit 2006 - д оролцсон юм. Тэгээд тэнд 2 дахь удаагаа Вьетнамын программ хангамжийн компанийн хүмүүстэй уулзлаа. Өмнө нь Хятадад нэг Вьетнам компанийн менежер залуутай танилцаж байсан юм. Тэр залуу маань ч энэ удаа Токиод компаниа төлөөлөөд ирж. Тэнд ирсэн компаниудын ихэнх нь ойролцоогоор 200-400 хүнтэй, нилээд нь өөр том IT компаниудын outsourcing чиглэлд дагнан ажиллаж буй салбар компаниуд нь байлаа.

Ер нь outsourcing чиглэлд Вьетнамууд амжилт гаргах ирээдүй маш их байгаа гэсэн ойлголт авсан байсан тул тандах зорилгоор тэдэнтэй нилээд дотнослоо. Харахад 30 дөхөж яваа болов уу гэмээр овор багатай голдуу 40 дөхөж буй насны, англиар бараг Вьетнам аялагагүй шахам ярьдаг залуус байна. Ихэнх нь компанийхаа CEO эсвэл өөр томоохон албан тушаал хашдаг хүмүүс. Энд зөвхөн Вьетнамын компаниуд биш мөн VINASA холбооныхон нь ч ирсэн байлаа. VINASA нь тус улсын IT компаниудын холбоо юм. Энэ холбоог маш амжилттай үйл ажиллагаа явуулж буй гэж үздэг.
Continue reading "Въетнамууд намайг гайхшруулав"

Зарим нэгэн зөвлөгөө бичлээ

Дараах 2 зүйлийг phpmn.org сайт руу бичлээ.

- CURL - Ерөнхийдөө зарчим нь AJAX тэгэхдээ арай өөр
- Олон хүнд нэг төрлийн и-мэйл илгээх тухай

Ер нь тэгээд нэг бичсэн зүйлсээ олон газар хуулж тавиад байх хэцүү тул цаашдаа PHP-тэй холбоотой зүйлсийг ихэнхдээ phpmn.org руу оруулж байя, харин илүү компанийн үйл ажиллагаатай холбоотой, эсвэл хувийн шинжтэй зүйлсээ мөн өөр технологийн сэдвээр бичсэн зүйлсээ блог руугаа бичиж байхаар шийдлээ.

phpmn.org ажиллаж эхэллээ

Нилээн дээрээс бодож явсаар байгаад амжихгүй байсан. Харин өчигдөр өөрийнхөө блог дахь PHP-тэй холбоотой бичлэгүүдэд бичсэн хүмүүсийн сэтгэгдэлийг хараад нэг зүйл бодлоо. Ингээд ганцаараа чалчаад суухын оронд аль болох олон хүнийг нэгтгээд хамтын хүчээр нэгэн зүйл хийвэл илүү олон хүн үр дүнг нь хүртэх нь гарцаагүй гэж.

Тэгээд өдөр ажлынхаа завсраар Drupal-ыг жаахан туршаад үндсэн шаардлагуудыг хангаж байсан, бас ч үгүй энгийн атлаа их боломжтой код бүхий, аюулгүй байдлын талаасаа бас гайгүй санагдаад саяхан бүртгүүлсэн байсан phpmn.org домайнд тохируулаад бага зэрэг янзлаад тавьлаа.

Хэрвээ та PHP сонирхдог бол энэ сайтаар ороорой. Зөвхөн ороод зогсохгүй мэддэг чаддагаа хүмүүстэй хуваалцаарай гэж уриалж байна. Бид цөөхүүлээ ч гэсэн цөөхөн гэдэг үг нь зөвхөн жижиг гэдэг сул талаасаа гадна, илүү шалмаг, хурдан гэсэн маш чухал утгийг агуулж болохыг сануулах нь илүүц буйзаа. Нэгдэцгээе, нэгдээд илүү шалмаг хөдөлцгөөе!

Блогдох тухай блогдох нь

Блог судалж эхлээд 2 жил гаран болж байна аа. Тухайн үедээ Blogger.com-ийг Google худалдаж аваад тэгээд Typepad гэх мэт төлбөрт үйлчилгээнүүд ч ид гаарч байсан үе юмуу даа. Монголчуудад зориулсан Blogger.com шиг сайт хийх юмсан гэж мөн ч удаан бодож байна.

2 жилийн өмнө Монголчууд маань төдийлан блог мэддэггүй байсан. Зарим нэгэнд нь тайлбарлаад ч гэсэн ойлгодоггүй байсан. Харин одоо блог, блогдох гэсэн ойлголт маань Монголчуудын дунд түймэр мэт хүчтэй дэлгэрч буй нь нөгөө өмнөх бодлоо бодитой болгоход хүчтэй нөлөөлж байх шиг байна.

Хамгийн гол нь миний бодлоор Монголчууд өөрсдийнхөө хийсэн юмыг анхнаас нь өөрсдөө хийгээд явахад тодорхой хэмжээгээр бид бүтээгээд байна гэсэн сэтгэхүй нь нэмэгдэх ёстой. Яг үүнийг л би блог дээр батлахыг хүсэж байна.

Учир нь яг одоо нөгөө хүчтэй түймэр маань blogger.com дагаад taniiner.blogspot.com гэсэн замаар асч буй нь нөгөө л анхнаасаа гадны юм хэрэглээд дасчихдаг сэтгэхүйг батжуулах вий дээ. Уул нь интернэтийн ертөнцөд өөрийн блогоо үүсгээд явах өчнөөн боломж бий. Харин манайхан blogger.com л хэрэглээд байгаа. Хэрэглэгчийн сонголтыг үгүйсгэх нь утгагүй тэгэхдээ энэ сонголт нь нэгнийгээ дагах байдлаар хийгдэж байгаад гол нь байна.

Тиймээс нэгэнт ингээд дагаад явчихдаг юм бол яагаад анхнаас нь Монгол бүтээгдэхүүн, Монгол брэндээр дагуулж болохгүй гэж. Энэ л миний яараад байгаа шалтгаан. Тэгэхдээ зүгээрээ энэ сардаа багтаад бид гал их асахаас өмнө амжих байх гэж найдна.

Одоо блогдож байгаа Монгол блогчид маань ч гэсэн энэ талаар нэгийг бодно биздээ. Бидний гаргаж ирэх шийдэл ямар ч байсан дэлхийн хэмжээний байх болно гэдгийг амлая.